Сніўся Пецю смачны сон:
На батоне ехаў ён.
Лётаў Сцёпка на бліне,
Як на цуда-дыване.
Цыркачом Сымон да ганка
Прыкаціў на абаранку.
Кліма ўзняў аж да аблок
Дырыжабль-агурок.
Паддаваў Мікіта пары –
Бег цягнік за самаварам:
Як вагоны – шклянкі, плюшкі,
А замест білетаў – сушкі.
Ды галодны бег Дзяніс –
Абаранак мігам згрыз.
А пасля – зблажэў зусім:
Паўбатона адкусіў.
I ў дадатак, на закуску,
Агурком Дзяніс захрускаў.
Да бліна не дацягнуўся,
Блін у рукі сам вярнуўся:
Апусціўся, бо дачасна
Ў ім без масла
Цяга згасла.
Толькі чаю не папіў,
Бо Мікіта затрубіў.
Тут і Пеця прахапіўся,
Смачны сон перапыніўся…
