Берагі кісельныя,
Рэчанька малочная.
З казак маленства
У раі панэльным,
Блочна-падаблочным,
Бераг сню кісельны,
Рэчаньку малочную.
Поле нетаптанае
Жаўруком агучана.
Я лаўлю Буланага,
Еду на заручыны.
З любаю абедаю
Над высокай кручаю.
Мы яшчэ не ведаем,
Што наш край атручаны.
Думы ў нас вясельныя,
Песні ў нас нязмрочныя…
Берагі кісельныя,
Рэчанька малочная.
1987
Крыніца: Пісьмянкоў А. Я не памру, пакуль люблю: Выбранае. – Мн.: Маст. літ., 2000. – 319 с.
